Një tjetër tërmet ka tronditur vendin tonë gjatë natës. Lëkundjet u ndjenë rreth orës 00:49, në distancë 33 km në Veri Perëndim të Tiranës, dhe 17 km nga Shijaku.
Tërmeti u regjistrua me magnitudë 4.3, me epiqendër detin Adriatik.
Tërmetet janë të paparashikueshme dhe ndodhin në thellësi shumë të mëdha të tokës, ku ngjarjet sipër saj nuk kanë asnjë ndikim. Se kur do të ndodhin lëkundjet e tjera, askush nuk mund ta shpjegojë shkencërisht.
Mini-tërmetet ndodhin gjatë gjithë kohës në të gjithë territorin e Shqipërisë, kjo pasi vendi ynë është një territor aktiv. Statistikat kanë treguar se tërmetet me magnitudë 4.5 janë të shpeshta, maksimumi dy herë në vit, minimumi njëherë, ndërsa tërmetet mesatare 5 deri në 5.5 ndodhin njëherë nga 2 deri në 5 vjet.
Tërmetet e forta, ato mbi 5.5 janë tepër të rrallë, kërkojnë dekada, mbi 10 vjet. Kjo për një arsye fare të thjeshtë, sa më i madh të jetë tërmeti, aq me shumë energji akumulohet, dhe aq më shumë kohë do që të ndodhë.
