Një tërmet i fuqishëm ka vrarë të paktën 250 njerëz, dhe ka lënë dhjetëra të plagosur në Afganistan, ka thënë një zyrtar lokal për BBC.
Fotot e shpërndara në mediat sociale tregonin njerëz në barela, rrënoja dhe shtëpi të rrënuara në provincën Paktika.
Një zyrtar i qeverisë lokale tha për “BBC”, se numri i të vdekurve prej më shumë se 250 ka të ngjarë të rritet dhe se më shumë se 150 të tjerë ishin plagosur.
Tërmeti goditi rreth 44 km (27 milje) nga qyteti juglindor i Khost. Lëkundjet u ndjenë në më shumë se 500 km në Afganistan, Pakistan dhe Indi, sipas Qendrës Sizmologjike Mesdhetare Evropiane, cituar nga “Reuters”. Qendra tha se dëshmitarët kishin raportuar se e kishin ndjerë tërmetin në kryeqytetin e Afganistanit, Kabul, si dhe në kryeqytetin e Pakistanit, Islamabad.
“Fatkeqësisht, mbrëmë pati një tërmet të fortë në katër rrethe të provincës Paktika, i cili vrau dhe plagosi qindra bashkatdhetarë tanë dhe shkatërroi dhjetëra shtëpi”, shkroi në Twitter zëdhënësi i qeverisë, Bilal Karimi.
“Ne u bëjmë thirrje të gjitha agjencive të ndihmës që të dërgojnë ekipe në zonë menjëherë, për të parandaluar katastrofën e mëtejshme”. Tërmeti ishte me magnitudë 6.1, në një thellësi prej rreth 51 km, sipas Shërbimit Gjeologjik të SHBA.
Burimi i lajmit: BBC. Përshtatur nga Tirana Today
