Polemikat në Itali sa vjen dhe shtohen pas ndeshjes mes Interit dhe Juventusit, e cila u cilësua si një “vjedhje e pastër” nga ana e bardhezinjve me ndihmën e arbitrit Orsato. Deklaratën me të fortë e ka dhënë sot kryebashkiaku i Napolit, Luigi de Magistris, i cili në Facebook ka postuar një mesazh shumë të fortë, me akuza që kalojnë nga sporti të politika dhe shteti.
“Jam gjithnjë një napolitan krenar, në gëzim e në dhimbje, me defektet dhe virtytet tona. Qyteti ynë dhe populli napolitan janë të lodhur nga padrejtësitë. Do e rimarrim atë që na keni hequr, do të rifitojmë atë që na takon. Asgjë më shumë se ç’na takon”.
De Magistris e ka me Juventusin: “Ndryshimi mes nesh dhe atyre që na uzurpojnë të drejtat tona është se ne gjithsesi jetojmë, sepse dashurojmë dhe kemi një zemër të madhe dhe humanizëm të thellë, ndërsa ata ndihen të fortë dhe të fuqishëm duke vjedhur, me vjedhje Shteti ose Futbolli. Atë që na është vjedhur do ta rimarrim, pa u ankuar dhe pa lypur, me shpinën drejt dhe duke luftuar. Dinjiteti ynë nuk ka çmim, etja jonë për drejtësi është e thellë. Së bashku fitohet, duke shembur ndërtesat e fuqive të korruptuara, duke arritur synimet tona. Rroftë Napoli!”.
