Viard Kotori 29 vjeç, Etmond Dokushi, 32 vjeç, dhe Ervin Kamolli, 32 vjeç, të akuzuar për “falsifikim monedhash” do të qëndrojnë në qeli. 29-vjeçari tentoi t’ia hidhte punonjëses së ”Exchange’ në Tiranë, por ajo e kuptoi dhe menjëherë njoftoi policinë.
Viard Kotori 29 vjeç është shfaqur në gjykatë i qetë dhe i buzëqeshur, ndërsa para trupit gjykues ka mohuar që paratë false të ishin të tijat, por se i kishte gjetur ato në rrugë. Ai madje shtoi se kishte gjetur 8 mijë dollarë, por të tjerat i kishte djegur.
Ngjarja ka ndodhur më 29 mars 2022, ku pas denoncimit policia është vënë në ndjekje të autorit dhe dy bashkëpunëtorëve të tij, duke i mbajtur nën vëzhgim prej javësh ku zbuloi aktivitetin e tyre. Identifikimi i autorit u bë përmes tatuazhit që kishte në krahë, që dukej në kamerat e “Exchange-it” dhe makinës që përdorte.
Ka qenë punonjësja e këtij “Exchange” që zbuloi falsifikimin dhe lajmëroi policinë, ku më pas u vunë në pranga tre persona.
“Gjeta 8 mijë dollarë në rrugë, të tjerat i dogja! Se dija që nuk ishin të vërteta”, ka dëshmuar para gjykatës Kotori.
Dialogu mes punonjëses dhe të riut
I riu: Si kalove… po flisje, po haje bukë?
(Punonjësja shikon lekët)
I riu: Ç’a ka?
Punonjësja: Ku shkon me këto?
I riu: Urdhëro, si ku shkoj?
Punonjësja: Se janë false të gjitha?
I riu: Je mirë?
Punonjësja: T’i sjell false dhe thua a jam mirë unë, apo të telefonojë policinë dhe të shohim kush është mirë ti apo unë?
I riu: Janë marrë nga banka?
Punonjësja: Janë marrë nga banka?
I riu: A ka mundësi që të m’i japësh lekët mbrapsht?
Punonjësja: Pse i sjell në këtë zyrë false? (I numëron, i dalin rreth 2000 dollarë).
