Ashpërsohen tonet diplomatike mes Shteteve te Bashkuara Amerikane dhe Sirisë. Ambasadorja amerikane në OKB,Nikki Haley, është shprehur sot në selinë e Kombeve të Bashkuara në Nju Jork se sulmi në Siri është kryer me armë kimike dhe për këtë SHBA ka prova që e vërtetojnë këtë fakt.
Një deklaratë e fortë e cila mund të sjelli ashpërsim të marrëdhënieve diplomatike mes dy vendeve. Haley akuzoi gjithashtu edhe presidentin sirian se po përpiqet të eliminojë kundërshtarët me këto armë. Ambasadorja amerikane shtoi se komuniteti ndërkombëtar nuk mund ta lejojë një gjë të tillë.
Ndër të tjera Haley akuzoi edhe Rusinë si shkatërrimtare të mekanizmave ndërkombëtarë të verifikimit, dhe si dorë ndihmëse e Sirisë për të fshehur gjurmët. Për të analizuar sulmin me armë kimike si dhe përgjigjen e SHBA-së ndaj këtij akti, Haley tha se administrata amerikane po zhvillon mbledhje të njëpasnjëshme.
