Ambasada Amerikane në Tiranë, ka publikuar një pjesë të mesazhit të Sekretarit Amerikan të Shtetit, Antony Blinken, sa i takon përplasjeve të forta mes Rusisë dhe Ukrainës. Ambasada e SHBA-së citon Blinken, i cili nga Berlini iu është përgjigjur ashpër kërcënimeve që vijnë nga agresioni rus, teksa është shprehur se diplomacia është e vetmja zgjidhje e pranueshme.
Shtimi i trupave ruse pranë Ukrainës, mund të sinjalizojë planet e Moskës për një sulm ndaj vendit fqinj. Kremlini këmbëngul se nuk ka një qëllim të tillë dhe ka akuzuar Ukrainën dhe mbështetësit e saj perëndimorë, se kanë ngritur pretendime për të mbuluar planet e tyre të supozuara agresive. Nuk është e qartë nëse përqendrimi i trupave ruse paralajmëron një sulm të afërt. Presidenti Vladimir Putin i ka kërkuar Perëndimit që të përjashtojnë mundësinë e anëtarësimit të Ukrainës në NATO, ndaj shtimi i trupave në kufi mund të reflektojë përpjekjen ruse në mbështetje të mesazhit të saj.
“Fola në Berlin, në Akademinë e Shkencave dhe Studimeve Sociale Berlin-Brandenburg, për kërcënimet që vijnë nga agresioni rus. Diplomacia është e vetmja zgjidhje e pranueshme. Aleatët dhe partnerët qëndrojnë të bashkuar në mbështetje të Ukrainës”, tha Sekretari Amerikan i Shtetit, Antony Blinken.
