Kreu i Partisë Demokratike, Lulzim Basha ka sulmuar kryebashkiakun e ri të Bashkisë Kamëz, Rakip Suli, i cili ditën e sotme bëri betimin dhe hyri në zyrën e tij.
Me anë të një reagimi në “Facebook”, Basha deklaron se Suli ka hyrë brenda në godinën e bashkisë me ndihmën e shefit të policisë, Sali Skura, teksa e quan bandit, pasi sipas tij, ka dhunuar dhe më pas zaptuar selinë e bashkisë së Kamzës.
Po ashtu, ai u shpreh se Skura është pjesë e dosjes 184, teksa shtoi se ngrinte postblloqe për të ndaluar votuesit.
Reagimi i plotë i Bashës:
Hajduti Rakip Suli me ndihmën e banditit Sali Skura dhunuan dhe zaptuan sot me forcë selinë e Bashkisë Kamëz. Për dhunën hajdutërore të dy këta kriminelë do të përgjigjen shpejt para ligjit! Uroj për të mirën e tyre dhe të Hajdutit Psiqik, që ajo ditë të vijë më shpejt se dita e përballjes me zemërimin e popullit!
Rakip Suli ky hajdut i milonave të shqiptarëve me tendera dhe qira që i përfitoi kur ishte deputet në konflikt të pastër interesi, duhet të ishte ndjekur penalisht dhe dënuar. Sali Skura i dosjes 184 që ngrinte postblloqe për të ndaluar votuesit e opozitës duhet të ishte në burg.
Por sa kohë Edi Rama është në zyrën e kryeministrit, nuk do ketë as drejtësi dhe as demokraci, banditët, kriminelët dhe hajdutët do të sundojnë Shqipërinë.
Shporrja e Hajdutit Psiqik dhe bandës së tij është jetike për sigurinë dhe jetën e çdo familje shqiptare!
