KFOR-i ka rritur praninë e saj në vendkalimet Jarinje dhe Bërnjak, si dhe aktivitetet e tij patrulluese në zonë, me qëllim të rritjes së vetëdijes për situatën. Zyra për Marrëdhënie me Publikun e KFOR-it, ka deklaruar se masat në fjalë janë marrë për t’i mundësuar KFOR-it t’i përgjigjet shpejt të gjitha sfidave të sigurisë.
“Dëshirojmë t’i sigurojmë të gjithë se KFOR-i është i gatshëm të ndërhyjë nëse është e nevojshme”, thuhet në përgjigje të pyetjeve të “Kosovo Online” lidhur me praninë e shtuar të KFOR-it në vendkalimin e Jarinjes dhe ardhjen e mjeteve të Forcës së Sigurisë së Kosovës në këtë zonë.
Mandati i Misionit të KFOR-it, i cili buron nga Rezoluta 1244 e KS të vitit 1999, është që të sigurojë një mjedis të sigurt dhe lirinë e lëvizjes për të gjithë njerëzit në Kosovë.
“Për të kryer detyrat e veta, KFOR mban një qëndrim të dukshëm dhe të shkathët në terren”, thekson Zyra për Marrëdhënie me Publikun e KFOR-it.
Sekretari i Përgjithshëm i NATO-s, Jens Stoltenberg do të takojë sot në Bruksel liderët e Kosovës dhe Serbisë, në kohën kur zyrtarët nga këto dy shtete kanë ashpërsuar retorikën, pas ngritjes së barrikadave në veri tri javë më parë.
Stoltenberg do të zhvillojë takime të ndara me kryeministrin e Kosovës, Albin Kurti, dhe presidentin e Serbisë, Aleksandar Vuçiç.
