Një nga konfliktet më të vjetër në botë, mosmarrëveshja territoriale midis Armenisë dhe Azerbajxhanit ka shpërthyer sërish. Përleshjet kufitare shpërthyen të dielën në mëngjes, pasi forcat armene shënjestruan vendbanimet civile të Azerbajxhanit dhe pozicionet ushtarake në rajon, i cili njihet gjithashtu si Malësia e Karabakut. Marrëdhëniet midis dy ish-shteteve sovjetike kanë qenë të tensionuara që nga viti 1991, kur ushtria armene pushtoi Malësinë e Karabakut, një territor i njohur ndërkombëtarisht i Azerbajxhanit.
Por gjatë ditës së sotme, Azerbajxhani ka lëshuar paralajmërimin e fundit ndaj Armenisë, e cila po vazhdon të sulmojë vendbanimet civile.
“Ministria e Mbrojtjes i jep paralajmërimin e fundit Armenisë, se masat e duhura si kundërpërgjigje do të merren kundër tyre nëse është e nevojshme”, theksohet në deklaratën nga Ministria e Mbrojtjes.
Ministria po ashtu publikoi pamje ajrore të shkatërrimit të tankeve armene, dhe automjeteve të blinduara gjatë përleshjeve.
Së paku 23 persona janë vrarë të dielën, në luftimet midis dy-ish republikave sovjetike.
Presidenti i Azerbajxhanit, Ilham Aliyev, tha se është i sigurt se do të rimarrë kontrollin mbi Nagorno Karabakun.
“Jemi në prag të një lufte të shkallës së plotë në Kaukazin Jugor”, paralajmëroi kryeministri armen, Nikoll Pashinian, duke e akuzuar Azerbajxhanin për agresion të planifikuar.
