Deputeti Myslim Murrizi, i cili dërgoi në SPAK kallëzimin penal për abuzimin me tenderin për uniformat e policisë, ka dhënë detaje të reja në lidhje me këtë çështje.
I ftuar në emisionin ”Frontline” në News24, Murrizi u shpreh se për të njëjtat pantallona, por për tre forca në polici kanë çmime të ndryshme me diferencë të madhe.
Ai komentoi dhe shkarkimin e drejtoreshës së prokurimeve publike në MPB Edlira Naqellari një javë para arrestimeve, teksa foli për rrjedhje të informacionit.
Myslim Murrizi: ”Është një uniformë disaster. Kam kontakt me policët, t’ia shihje bluzën e pambukut…Po të shikosh çmimet, dy lloje xhupash, xhupat që mbajnë drejtuesit e lartë të Policisë së Shtetit, më i fisshëm, që përdoret në takime me homologë, 1000 copë, është 43 mijë e 200 lekë të vjetra. Ky xhupi i policëve janë blerë 13500 është 114 mijë lekë, 3 fish më i shtrenjtë Këpucët, kjo për drejtuesit janë blerë 396 palë nga 22 mijë lekë të vjetra. Nga kjo tjetra që do të veshin policët 14200, janë blerë 74 mijë lekë. Tek këta janë vjedhur më shumë.
Tre palë pantallona, i njëjti model. Tre çmime. Pantallona për policinë rrugore 4000 palë, 46 mijë e 800 lekë. Për patrullën e përgjithshme 48 mijë lekë, pantallona doku për forcën e posaçme 1500 palë, 36 mijë lekë çmimi. I njëjti model, të njëjtat pantallona vetëm se do e veshin tre trupa policore të ndryshme. Kur e veshin Shqiponjat ka çmim tjetër, kur e veshin rrugorët tjetër. Për mua do të thotë që ka shfry informacioni. Duke qenë drejtorja e prokurimeve publike të shkarkohet në mënyrë kaq urgjente. E para nuk mundet, nëse nuk ka dhënë dorëheqjen, ka vite aty, mund të ketë statusin e nëpunësit civil. Nuk di të ketë dorëheqje nga zonja. Ka shfryrë. Besoj që ka qenë në dijeni për fletë-arrestin, një javë më parë. Ndoshta kanë menduar për të mos i prishur biografinë ministrisë.
