Tre ditët e para të korrikut janë shoqëruar më temperatura shumë të larta. Në këto tre ditë janë djegur 15 hektar me shkurre dhe pisha. Zjarret kanë përfshirë disa qarqe të vendit. Më poshtë janë listuar rastet e zjarrit për këto tre ditë.
Qarku Fier
Në fshatin Lekaj, Njësia Administrative Hys Gjokaj, Lushnje ka rënë zjarr në një masiv me pisha. Flakët të ndihmuara edhe nga era e fortë janë përhapur me shpejtësi. Si pasojë e flakëve është djegur një sipërfaqe prej rreth 10 ha me shkurre dhe pisha. Aktualisht zjarri është izoluar dhe po punohet për shuarjen e tij. Sipas informacioneve paraprake dyshohet se zjarri ka qenë i qëllimshëm.
Vatra tjetër e zjarrit në qarkun e Fierit ka rënë në një sipërfaqe me pisha në fshatin Gjorgos, Cakran, Fier.
Qarku Elbasan
Në fshatin Hasmashaj, Njësia Administrative Gjocaj, Peqin ka rënë zjarr në një sipërfaqe me shkurre dhe ferra. Si pasojë e zjarrit një sipërfaqe prej rreth 3 ha me shkurre është djegur.
Qarku Dibër
Në fshatin Gurë Lurë, ka rënë zjarr në një sipërfaqe me shkurre dhe pisha. Shërbimi vendor i MZSH Dibër, ka shkuar në vendngjarje dhe ka punuar me mjete rrethanore për shuarjen e zjarrit për shkak të terrenit të thyer malor, e megjithatë është djegur një sipërfaqe rreth 2 ha me shkurre dhe disa pisha.
Qarku Lezhë
Në Laç nga rënia e zjarrit është djegur një sipërfaqe e konsiderueshme me shkurre dhe pisha.
Drejtoria e Përgjithshme e Emergjencave Civile u kërkon të gjithë qytetarëve që në rast se konstatojnë zjarre, të njoftojnë menjëherë në numrat e emergjencave 112, 129, apo në Qendrën Kombëtare Operacionale të Emergjencave Civile në numrin 06941 10 198.
