Një perlë e Bruno Telushit në minutën e 52-të rezultoi përcaktuese për fitoren 2-0 të Partizanit (realizoi më pas edhe Jurgen Bardhi) ndaj Kastriotit, që me këtë paraqitje që ofroi në “Selman Stërmasi” tregoi se nuk ka asnjë lidhje me ekipin e dy fazave të para, që me meritë mbante vendin e fundit në tabelë.
Të kuqtë dhe krutanët ishin ndeshur pak ditë më parë edhe në Kupën e Shqipërisë, por duket se Bledar Devolli atë takim e kishte shfrytëzuar për të “fshehur” forcën reale të organikës që drejton. Në pjesën e parë Kastrioti jo vetëm që nuk u tërhoq në zonën e tij, por ushtroi presion të vazhdueshëm në gjysmëfushën e të kuqve, duke krijuar disa momente të rrezikshme në portën e Hoxhës.
Partizani u rikthye në fushë pas pushimit mes pjesëve me tjetër mentalitet. Gjithsesi, për të thyer kundërshtarin u desh një koordinim perfekt i Bruno Telushit, si në kontrollin me gjoks të topit dhe në ekzekutimin fluturimthi, për të thyer portierin mik, që s’mund të bënte asnjë ndaj një goditjeje të kalibruar që përfundoi në trekëndësh.
Supergoli i Telushit on Vidnews.
Vetëm 8 minuta më vonë Esat Mala goditi shtyllën në një pozicion të prirët, por Bardhi, që ndoqi aksionin, reagoi në vendin e momentin e duhur, duke tundur për herë të dytë rrjetën e Kastriotit, 2-0.
Goli i dyti e çliroi psikologjikisht ekipin e Gegës, që dominoi në minutat e mbetura, por pa mundur t’i shfrytëzonte rastet e tjera të krijuara.
Partizani me këtë fitore vë në presion psikologjik Kukësin (ka 8 pikë më pak) para sfidës me Tiranën, që do të zhvillohet në Kamzë.
