Në vëmendjen e vazhdueshme të mbështetjes së inovacionit dhe teknologjisë në bujqësi dhe blegtori është organizuar në Tiranë takimi mes ekspertësh shqiptarë e të huaj, me fermerët, agropërpunuesit, përfaqësues nga Shërbimi i Këshillimit dhe Qendrat e Transferimit të Teknologjive në vend, pedagogë e studentë nga Universiteti Bujqësor Tiranë si edhe përfaqësues nga programet ndërkombëtare të ndihmës në fushën e bujqësisë dhe zhvillimit rural në vend.
Ministrja e Bujqësisë dhe Zhvillimit Rural së bashku me Kryeministrin Edi Rama, përshëndetën pjesëmarrësit dhe aktivitetin, si një shtysë e mëtejshme për suportin e zhvillimit të sektorit bujqësor. Në fjalën e saj, ministrja Krifca tha se bujqësia dhe blegtoria sot, jo vetëm tek ne por në mbarë botën përballet me peshën e një lufte që ka ndikuar në rritjen e çmimeve dhe shkëputjen e hallkave të zinxhirit ushqimor. Moment që ka bërë liderat anekënd botës të vëmendshëm ndaj bujqësisë dhe prodhimit ushqimor si asnjëherë më parë, duke përmendur edhe takimin e G7, i cili kishte një panel të posaçëm për krizën ushqimore.
Megjithatë, ministrja shtoi se bujqësia shqiptare përballet sot me imperativin e domosdoshëm për të përqafuar teknologjinë, inovacionin, dijen dhe njohurinë si mënyra e duhur për të siguruar konkurrueshmëri.
“Jemi të vetëdijshëm që detyra nuk është e lehtë, sepse bujqësia shqiptare ruan në strukturën e saj pesha të të shkuarës të cilat e bëjnë më të vështirë integrimin e sistemeve mekanike apo të novacionit në sektor, ku mjafton të përmendim fragmentimin e tokës si një ndër sfidat e prodhimit. Ne na duhet të gjejmë zgjidhje konsideruar këtë struktur dhe këto sfida.
Dhe perpjekjet mund të bëhen për të konsoliduar fermën blegtorale, për të ulur kostot e prodhimit, rritur eficiencën dhe rendimentin si në blegtori ashtu dhe në bujqësi nëpërmjet mekanizimit, teknologjisë dhe inovacionit.
Krifca tha se nëpërmjet politikave të qarta për modernizim dhe rritje të konkurrueshmërisë, janë orientuar rreth 115 milionë euro investime, duke mbeshtetur me grant modernizimin e sektorit përgjatë 5 viteve të fundit ku 46 milionë euro investime kanë shkuar në drejtim të teknologjisë dhe inovacionit në ferma dhe përpunim.
“Rreth 27 milionë euro janë vënë në dispozicion të ndërtimit të sistemeve përpunuese me teknologji të lartë ftohëse, ruajtëse frigoriferike dhe seleksionuese të produkteve bujqësore. Duke futur për herë të parë mbështetjen për eficencë energjitike me panele fotovoltaike të cilat kanë reduktuar me rreth 30 deri në 50% faturën mujore të energjisë elektrike për këto aktivitete agropërpunuese”.
Ministrja bëri me dije se në bashkëpunim me BERZH po ndërtohet një portal në dispozicion të fermerëve dhe agrobizneseve, me të dhëna për mundësitë e financimit, transparencë për politikat, ofrimin e informacioneve lidhur me tregun dhe prodhimin në vend.
