Emri i tij i plotë është Jean-Claude Camille François Van Varenberg. Lindi më 18 tetor 1960 në Bruksel të Belgjikës. Babai i tij ishte luleshitës, e ëma kontabiliste. Kur ishte 12-vjeç, Van Damme u bë pjesë e Qendrës Kombëtare të Karatesë, ku u stërvit për 4 vjet dhe fitoi një vend në ekipin kombëtar. Ai studioi paralelisht edhe për balet klasik. Pasi u tërhoq nga sporti i karatesë në vitin 1982, shkoi në SHBA për tu bërë një yll i kinemasë. Rolet e para ishin pjesë të vogla, kryesisht si figurant. Më pas erdhën sukseset e tij të para, për të cilët pati ndihmën e aktori të njohur amerikan të filmave aksion, Chuck Norris.
Ai është martuar 5 herë, dhe është ndarë po aq herë. Në fund të viteve 1990, karriera e tij ishte në rënie, dhe ai nisi përdorimin e drogës. Van Damme e pranoi se konsumonte 10 gramë kokainë në ditë, që i kushtonte rreth 10.000 dollarë në javë. Iu deshën shumë muaj të dilte disi nga ai tunel i errët. Në vitet 1999-2008, realizoi 14 filma që u vlerësuan si të dobët nga kritika. Abuzimi me drogën, ka qenë i lidhur me çrregullimin e tij bipolar, nga i cili ka vuajtur për vite të tëra.
Shumë herë ka pasur luhatje humori dhe mendime për të vrarë veten. Pasuria e tij aktuale, vlerësohet në rreth 30 milionë dollarë. Dikur fitonte 12 milionë dollarësh për një film, sot pranon një rol edhe për 100 mijë dollarë.
