Dy nxënës kanë humbur jetën, pas të shtënave ditën e djeshme në një shkollë të mesme në Santa Clarita të SHBA-së. Bëhet fjalë për një vajzë 16-vjeçare dhe një djalë 14-vjeçar. Ndërsa katër adoleshentë të tjerë mbetën të plagosur.
Mësohet se autori që ka qëlluar me armë zjarri është nxënës i shkollës. Autoritetet japin njoftimin se ai ndodhet në spital në gjendje kritike për jetën, pasi qëlloi veten në kokë.
Përmes një postimi në “Twitter”, sherifi i qarkut të Los Anxhelosit, Alex Villanueva shkruan: “I dyshuari ndodhet në paraburgim dhe po trajtohet në një spital të zonës”.
Mamaja e një prej nxënësve tha për “CNN”, se ajo bashkë me vajzën e saj po shkonin për në shkollë, teksa në një moment, e bija u telefonua nga miqtë.
“Shokët e saj dëgjuan pesë të shtëna. Ata ndodheshin në palestër, kur dëgjuan të shtënat. Miqtë e saj e telefonuan menjëherë dhe i thanë që mos të shkojë në shkollë”, u shpreh Hannah de Caussin.
Sulmi ndodhi 20 minuta para se të fillonte mësimi. “Të gjithë jemi vërtet të mërzitur. Kjo është një lagje paqësore. Është tronditëse. Fëmijët po kontaktojnë me njëri-tjetrin për të mësuar se kush janë viktimat”, tha de Caussin.
