Ndonëse ende nuk është e vërtetuar nga kërkuesit, thuhet se rënia e dhëmbëve ndodh tek ata pacientë që e kanë kaluar koronavirusin. Simptomat që përjetojnë pacientët janë të ndryshëm nga njëri-tjetri.
Disa nga personat që kanë kaluar virusin, kanë raportuar simptoma të çuditshme pas infeksionit. Sipas “New York Times”, këtyre pacientëve përveç shumë problemeve fizike, u kanë rënë edhe dhëmbët. Vlen të theksohet fakti se dentistët ende nuk kanë prova konkrete për këtë gjë.
Por që kur nisi pandemia, lista e simptomave dhe pjesëve të trupit që sulmohen nga koronavirusi, ka ardhur duke u rritur. Covid-19 shkakton probleme me frymëmarrjen dhe sulmon mushkëritë. Por një sërë studimesh të fundit tregojnë se virusi prek dhe sistemin tonë vaskular, organe të tjera, zemrën, madje dhe trurin.
“Ne po shohim një sërë sëmundjesh; disa njerëz pësojnë mpiksje gjaku, të tjerë goditje në zemër ose dështim të veshkave,” kanë thënë kërkuesit më herët.
Dentistët shprehen se është diçka shumë e rrallë që dhëmbët të bien vetë, pa asnjë shkak dhe pa dhimbje. Shumë pacientë me koronavirus raportojnë humbje të shijes dhe aromës, pasi virusi prek të parat organet. Ajo që dihet është se koronavirusi sulmon gojën, për shkak se ajo është rruga kryesore prej nga mund të merret infeksioni, dhe së bashku edhe me hundën janë një inkubator mikrobesh.
