Presidenti Ilir Meta vizitoi gjatë mesditës ambientet e “Fundjavë Ndryshe”, në kuadër të Aleancës për Dhurimin e Gjakut. Kreu i shtetit, Ilir Meta, foli për rëndësinë e dhurimit të gjakut, e nevojën e vullnetarizmit të njerëzve, për ata të cilët kanë nevojë.
“Për mua është një kënaqësi e veçantë që të vizitojë këtë qendër kaq impresionuese, sociale të të rinjve, të rinjtë e një “Fundjave Ndryshe”, janë të rinj të veçantë, të cilët i duhen shoqërisë sonë, në mënyrë të veçantë të rinisë sonë, si model të angazhimit social, solidarizim të gjithëpërfshirjes, pasi këto vlera na mungojnë.
Nuk janë aty ku duhet dhe është detyra jonë ti rinovojmë këto modele solidariteti, pasi një vend dhe një shoqëri nuk mund të ecë në mënyrë individuale përpara dhe aq më tepër të ndarë, por mund të ecë në mënyrë të bashkuar, ku ata që kanë më shumë mundësi, të ndihmojnë ata që kanë pak mundësi.
Që ata të kapin ritmin për të realizuar ëndrrat, dëshirat e tyre që kanë të rinjtë tanë, që të mos e kërkojnë realizimin e ëndrrave jashtë vendit dhe të mos bien pre e depresionit dhe varësive si droga, alkooli, bastet, të cilat ua humbasin motivimet në jetë, për të realizuar potencialet dhe talentet e tyre”, tha Meta.
Sakaq, drejtuesi i “Fundjavë Ndryshe”, Arbër Hajdari, shprehu vlerësimin për iniciativën e ndërmarrë nga presidenti Meta, duke e falenderuar njëkohësisht për këtë nismë.
“Dëshiroj të falenderoj Presidentin e Republikës, për iniciativën fantastike që ka marrë për krijmin e Aleancës për Dhurimin e Gjakut. Është një fenomen shumë i rrezikshmëm për vendin tonë, pasi të gjithë e dimë se ka pasur mungesë për dhurimin e gjakut”.
https://tiranatoday.com/fushata-e-dhurimit-te-gjakut-meta-i-bashkohet-fundjave-ndryshe/
