Shqipëria është shumë larg politikave të mirëqenies sociale. E keqja është se asnjë nga partitë që janë në Kuvendin e Shqipërisë nuk ka politikat e shtetit të mirëqenies sociale. Ndaj situata për vendin tonë është shumë e rëndë. Shifrat tona tregojnë se ne jemi duke bërë progres por të gjitha statistikat e orkestruara nga qeveritë që janë në pushtet të njëjtën gjë tregojnë. Me pak fjalë po të jesh i pa pune në Shqipëri bjeri halli tënd mbrapa me miq e me shokë dhe farefis sepse për të ndihmuar shteti nuk të ndihmon njeri. Duke mos dashur ti referohemi shifrave që publikon shteti i referohemi atyre ndërkombëtare që bëjnë matje në të gjithë botën.
Një studim i fundit i Organizatës Ndërkombëtare të Punës, Ilo, tregon se situata është alarmante, jo vetëm në terma absolutë por edhe në krahasim me vendet e tjera të botës.
Këto shifra, të ilustruara edhe grafikisht, tregojnë se, në Shqipëri vetëm 6.9% e të papunëve përfitojnë asistencë monetare. Shifra, jo vetëm që është tepër larg 100%, që në vendet më të zhvilluara të botës, dhe kryesisht në Europën veriore janë një standard mëse normal, por e vendos Shqipërinë ndër vendet e fundit në listë në Europë dhe Azinë Qendrore.
Në botë ndërkohë është e 12-ta nga fundi në këtë drejtim. Rezulton se, në Europë më keq se vendi ynë është vetëm Bosnjë-Hercegovina dhe Turqia. Shifra tregon se, praktikisht, vetëm një në 15 të papunë përfiton asistencë në vendin tonë.
Por ajo që e bën edhe më alarmante situatën është fakti se, në vitin 2000, kjo normë fiksohej në 10.2%. Kjo do të thotë se, vendi ynë jo vetëm që nuk ka bërë hapa para për t`iu afruar standardeve europiane, por është larguar edhe më tej nga këto standarde, shkruan Scan.
Gjithsesi, duhet theksuar fakti se, në raportin e ILO—s, të dhënat i referohen atyre të fundit të disponueshme, e që në rastin e Shqipërisë në pjesën dërrmuese i referohen vitit 2015.
