Suedia mposhti Turqinë të dielën në mbrëmje në transfertë me rezultatin e gushtë 0-1. Humbja në shtëpi la përfundimisht në vendin e fundit në grup Turqinë, e kaluar me 1 pikë nga Suedia në renditje, por kjo e fundit ka edhe një ndeshje për të luajtur.
Por në këtë sfidë është regjistruar një skandal i madh dhe protagonist është arbitri kryesor i takimit, rumuni Istvan Kovaçsh. Ai në pushimin e pjesës së parë i premtoi suedezëve 2 penallti në pjesën e dytë të ndeshjes, të cilën e fituan 1-0… me një penallti në pjesën e dytë.
Gjithçka është zbuluar pas ndeshjes që e hodhi Turqinë në Ligën C nga sulmuesi suedez Markus Berg, i cili kishte folur në pushimin e ndeshjes me gjyqtarin. Ai i kishte kërkuar llogari kryesorit për një episod të diskutueshëm në zonën kundërshtare gjatë pjesës së parë.
“Në pushim, shkova të flisja me gjyqtarin që të protestoja për një penallti që shkaktuan ndaj meje por të cilën ai nuk sinjalizoi. U takuam në dhomat e zhveshjeve i tregova pikëpamjen time dhe më bëri një premtim. ‘Do të shoh pamjet dhe nëse e kuptoj që kam bërë gabim në aksionin që pretendon ti, do të të fal dy penallti në pjesën e dytë”, ishin fjalët që Berg tha për “Aftonbladet” pas ndeshjes.
Si për ironi të fatit, penalltia e realizuar në minutën e 71 nga Grankuist, u fitua pikërisht për një faull ndaj Berg, të sinjalizuar nga rumuni Kovaçsh.
Sipas informacioneve nga Turqia, pasi këto deklarata u bënë publike, Federata Turke ka filluar të ndjekë çështjen në rrugë ligjore dhe kërkon të paktën përsëritjen e ndeshjes pasi e cilëson të njëanshëm qëndrimin e gjyqtarit.
