Presidenti i Shteteve të Bashkuara të Amerikës, Joe Biden shprehu mbështetjen e tij për popullin e Kubës, mes protestave në vend për mungesën e lirive dhe përkeqësimin e ekonomisë, duke i bërë thirrje regjimit të Presidentit kuban Miguel Diàz-Canel të “dëgjojë popullin dhe t’u shërbejë nevojave të tyre”.
“Ne qëndrojmë me popullin Kuban dhe thirrja e tij e qartë për liri dhe lehtësim nga pandemia dhe nga dekadat e shtypjes dhe vuajtjes ekonomike ndaj të cilave ata janë nënshtruar nga regjimi autoritar i Kubës,” tha Biden në një deklaratë, shkruan CNN.
Zyrtarët e Shtëpisë së Bardhë po monitorojnë nga afër protestat në Kubë, me këshilltarin e sigurisë kombëtare Jake Sullivan i cili paralajmëroi autoritetet kubane që të mos ushtrojnë dhunë kundër protestuesve paqësorë.
Mijëra kubanë dolën në rrugë të dielën për të protestuar për mungesën e ushqimit dhe ilaçeve, ndërsa vendi po kalon një krizë të rëndë ekonomike të përkeqësuar nga pandemia Covid-19 dhe sanksionet e SHBA-ve.
Presidenti kuban, Miguel Díaz-Canel, vizitoi San Antonio de los Banos dhe pranoi se njerëzit kishin dalë të shprehnin zhgënjimin e tyre, por fajësoi një fushatë të mediave sociale “të mafies kubano-amerikane” për trazirat. Ai fajësoi gjithashtu Shtetet e Bashkuara, të cilat në kohën e ish presidentit Donald Trump, rivendosën një embargo tregtare ndaj Kubës.
Kuba po përjeton periudhën më të rëndë të përballjes me pandeminë e koronavirusit. Zyrtarët shëndetësorë raportuan të dielën një rekord prej 6 mijë e 923 infektimesh dhe 47 viktima.
