Nesër përpara Gjykatës së Krimeve të Rënda pritet të dalin nëntë të arrestuarit e operacionit “Oaz” që u vunë në pranga 3 ditë më parë, e ku do të njihen me masën e sigurisë.
Seanca është parashikuar që të mbahet rreth orës 14:00, ndërsa nuk parashikohet të ketë ndonjë ndryshim nga vendimi i mëparshëm i gjykatës, e cila ka vendosur me herët për 11 persona arrest me burg.
Ndërkohë, mësohet se një prej dy personave të shpallur në kërkim Enver Bajri, i konsideruar dhe si kreu i grupit kriminal është jashtë Shqipërisë. Sipas burimeve policore dyshohet se ai fshihet në Belgjikë, vend ku ka qëndruar me kohë të plotë gjatë 4- viteve të fundit.
Referuar edhe përgjimeve ai konsiderohet si person që qëndronte në krye të grupit kriminal. Policia belge ndërkohë dyshon se grupi Bajri kontrollonte veprimtari në fushën e trafikut të lëndëve narkotike, gjobëvënies dhe aktiviteteve të tjera kriminale.
Po sipas burimeve gjatë operacionit ditën e premte në Shkodër, task forca qendrore dhe Prokuroria për Krime të Rënda kanë shmangur përfshirjen e policisë lokale duke dërguar forca nga Tirana, nga frika e dekonspirimit të mundshëm të operacionit.
Mbi të pandehurit rëndojnë akuza të rënda penale të kryera në kuadër të grupit të strukturuar kriminal. Ndërkohë sipas Prokurorisë të provuara janë akuzat për dy vrasje, ndërkohë që pritet të hapen edhe ngjarje të tjera pa autor, ku dyshohet se janë të përfshirë anëtarët e grupit Bajri.
