Numri dy i Partisë Socialiste duket se është shumë i “ndjeshëm” për fatin e partisë kundërshtare, pikërisht Partisë Demokratike.
Taulant Balla është shprehur pak më parë se Berisha ia la të djathtën Bashës në dorë si një lodër, ndërsa vetë Basha po e thyen çdo ditë e më tepër këtë lodër.
“Unë do t’i shkoj deri në fund këtij procesi. Do të fitoj një vendim gjykate që s’do më vlejë vetëm mua, por edhe PD-së. Kur thamë që Berisha ia la PD-në Bashës si lodër, ky kalamani po e thyen lodrën çdo ditë. Kjo nuk është PD që ishte 25 vite më parë, me një mision historik”, tha Balla.
Numri 2 i PS-së ka paditur Bashën për shpifje si dhe nxjerrje të sekretit hetimor për çështjen e 3.4 milionë eurove të gjetura në dy makina “Toyota Yaris” në Portin e Durrësit.
Duke folur për seancën gjyqësore, deputeti socialist e cilësoi kryedemokratin një frikacak, që zgjodhi të mos paraqitet në Gjykatë. Po ashtu, Balla u shpreh se është i kënaqur me punën e Prokurorisë.
“Mbrëmë ndoqëm një Babale 2. Nuk e njoh dhe nuk e kam takuar kurrë Fredi Alizotin. Prokuroria po bën një punë të shkëlqyer në zbardhjen e kësaj çështjeje. Të vazhdojë hetimin deri në fund. Rasti i largimit të Salianjit nga TV Klan duke vënë në rrezik dhe rojen duke ikur me shpejtësi, ishte një rast aspak normal. Ne deputetët duhet të jemi shembull”, përfundoi Balla./ TIRANA TODAY
