Bosnja dhe Hercegovina kanë reaguar pas vendimit të Qeverisë së Kosovës për vendosjen e taksës së importeve. Ministri i Jashtëm Igor Crnadak e cilësoi këtë vendim në kundërshtim të plotë me parimet e tregtisë së lirë në rajon, si dhe me parimet e përgjithshme të marrëdhënieve rajonale.
“Ndaj këtij vendimi të autoriteteve në Prishtinë, Bosnja do të reagojë në kuadër të CEFTA-s – Marrëveshjes së Tregtisë së Lirë midis vendeve të Evropës Qendrore. Unë po ashtu do të kërkoj që ky vendim i Prishtinës të futet në rend dite në takimin e ministrave të Jashtëm të vendeve të Ballkanit Perëndimor, që do të mbahet më 29 dhe 30 nëntor në Mal të Zi”, tha Crnadak, raporton Shërbimi i Ballkanit i Radios Evropa e Lirë.
Qeveria e Kosovës mori të martën vendimin për vendosjen e taksës doganore mbi mallrat e importuara nga Serbia dhe Bosnja e Hercegovina. Kjo masë nënkupton taksën prej 10% në të gjitha importet me prejardhje nga këto shtete.
Edhe ministri i Jashtëm i Serbisë, Ivica Daçiç ka reaguar lidhur me këtë vendim, teksa tha se masa është një mesazh i Prishtinës për Bashkimin Evropian, që t’iu miratojë qytetarëve kosovarë liberalizimin e vizave.
“Nuk kemi çfarë të ndërmarrim. Kjo është mënyra se si funksionon Prishtina”, tha Daçiq për gazetarët në Beograd.
