(CNN) Fama globale është e vështirë për tu përballuar për çdo 7-vjeçar. Por në Afganistan ajo mund të sjellë shumë pasoja të rënda, madje kërcënime dhe rrezik pengmarrje.
Në janar të vitit 2016, një foto e Murtaza Ahmadit u bë virale. Ai kishte improvizuar një fanellë të Argjentinës, e cila ishte një qese plastike dhe pas saj ishte shkruar me stilolaps emri i idhullit të tij, Lionel Mesit. Fëmija fitoi famë menjëherë dhe pas 11 muajsh arriti të takohet me Messin në Doha.
Sot, Ahmadi dhe familja e tij janë në arrati. Problemet për Ahmad filluan pasi u takua me heroin e tij në një vizitë të shkurtër në Katar. Pas këtij takimi jeta e tij u vu në rrezik, pasi talebanët në nëntor, pushtuan krahinën e Jaghori në provincën Ghazni, ku ai u rrit.
“Talebanët po vrisnin të afërmit tanë dhe po kërkonin çdo shtëpi, ata ndalonin makinat dhe vrisnin çdo udhëtarë”, tha Ahmadi për CNN. “Ne nuk mund të luanim futboll, apo të dilnim nga shtëpia. Gjatë gjithë kohës dëgjonim krismat e armëve të rënda, kallashnikovëve dhe raketave. Po ashtu edhe klithmat e njerëzve”.
Ahmedi u bë një objektiv i kërcënimeve, thotë nëna e tij, Shafiqa, pasi fitoi famën. “Që nga dita kur Murtaza u bë i famshëm, jeta u bë e vështirë për familjen tonë”, thotë Shafiqa. “Jo vetëm talebanët, por edhe disa grupe të tjera kanë filluar të mendojnë se Messi mund t’i ketë dhënë shumë para”.
Ahmedi thotë se i kërkoi nënës së tij që ta dërgonte diku tjetër. Babai i tij bëri të mundur që të transferoheshin në një qytet aty pranë, në Bamyan. “Herën e fundit kam parë babain tim ishte dita erdhëm këtu”, tha Ahmadi. “Pastaj ai u kthye, dhe nuk e kam parë më atë. Më mungon shumë.”
Nga Bamyan, Ahmedi dhe nëna e tij udhëtuan për në kryeqytetin Kabul, ku ata tani fshihen në mesin e shumë refugjatëve. Por nëna e tij ende nuk ndihet e sigurt, duke pasur frikë se të tjerë mund të duan të rrëmbejnë djalin e saj për shkak të lidhjeve të tij me futbollistin milioner.
“Do të kishte qenë më mirë nëse Murtaza nuk do të kishte fituar famë,” tha ajo. “Tani jetët tona janë në rrezik si në qytetin tonë dhe këtu në Kabul. Ai e kalon gjithë kohën këtu brenda shtëpisë”. TIRANA TODAY
