Presidenti i Kosovës, Hashim Thaçi ka pritur sot në një takim presidentin e Shqipërisë, Bujar Nishanin.
Thaçi dhe Nishani mbajtën një konferencë të përbashkët për shtyp, ku diskutuan për integrimin e Kosovës dhe Shqipërisë në Bashkimin Evropian.
“Procesi i integrimit do të vijojë pasi nuk është zgjedhje e politikanëve, por e qytetarëve. Nuk kemi alternativë tjetër”, ka thënë Nishani.
Gjithashtu, Thaçi theksoi “faktori i brendshëm duhet ta ndihmojë dhe përshpejtojë procesin e integrimeve si të Kosovës dhe Shqipërisë, që të kemi sa më tepër politikë të konsoliduar, institucione të konsoliduara dhe efektive”.
“Kosova është në prag të liberalizimit të vizave. Kosova ka përmbyllur me sukses dhe me vlerësim shumë të lartë nga BE implementimin e të gjitha kritereve për liberalizimin e vizave”, nënvizoi Thaçi.
Ndër të tjera, Nishani tha se situata politike nuk e favorizon procesin e integrimit në BE, por as nuk e ndalon atë.
Gjatë takimit Presidenti i Republikës së Shqipërisë, Bujar Nishani u nderua me “Urdhrin e lirisë”, ndërsa titulli i lartë iu dorëzua nga Presidenti i Kosovës, Hashim Thaçi, gjatë takimit që zhvilluan në presidencën kosovare.
