Kreu i PD-së Lulzim Basha, menjëherë pas daljes së tij në konferencë për mediat, thirri një takim me aleatët e tij në selinë blu. Pas takimit për mediat foli kryetari i Partisë Republikane, Fatmir Mediu ku u shpreh se arrestimet e fundit të kryera ndaj protestuesve të PD po na kthejnë në diktaturë.
Ndër të tjera shtoi edhe se Edi Rama po e kthen Shqipërinë hapa pas në rrugën drejt BE. Sa i përket zgjedhjeve Mediu tha se ato do të zhvillohen vetëm pasi Rama të japë dorëheqjen nga posti i kryeministrit dhe se protestat opozitare do të vazhdojnë.
Mediu u shpreh se Rama kur ka ardhur në pushtet e gjeti Shqipërinë në NATO dhe me liberalizim vizash, kurse sot vendi ka degraduar në një situatë të tmerrshme.
“Nëse Edi Rama kur erdhi në pushtet e gjeti Shqipërinë në NATO, ai ka sjellë vetëm rrënim, e prandaj duhet të ikë që mos pengojë integrimin e vendit. Ne kemi thënë që duhet të ikë Rama, duhet qeveri tranzitore”, tha Fatmir Mediu.
Më vonë në orën 18:00 kreu i opozitës Basha pritet të zhvillojë një mbledhje të jashtëzakonshme me kryesinë e Partisë Demokratike, Kolegjit te Kryetarëve dhe Kryetarëve të Bashkisë, për të vendosur rreth aksionit politik që do të ndërmarrë opozita e bashkuar gjatë këtyre ditëve, duke paralajmëruar kështu një tjetër protestë.
