Ministri i Punëve të Brendshme i Turqisë, Süleyman Soylu ndodhet në Tiranë për një vizitë zyrtare, teksa mësohet të ketë zhvilluar edhe një takim me kryeministrin Rama.
Nga raportimet e para, mësohet se fokusi i bisedimeve në këtë takim të mbyllur ka qenë dorëzimi i anëtarëve të Lëvizjes së Fethulla Gylen, në Shqipëri. Kjo organizatë është pjesë e listës së terroristëve në Ankara, pasi akuzohet për tentativën për grusht e shteti më 15 korrik tw 2016-s.
Turqia e ka kërkuar edhe më parë nga autoritetet shqiptare ekstradimin e anëtarëve të Lëvizjes Gylen. Gjithashtu në këtë takim mësohet të jetë diskutuar edhe për luftën kundër krimit të organizuar dhe çështjeve të migracionit.
Ministri turk ka zhvilluar edhe një takim me ministrin e Brendshëm, Sandër Lleshaj, të cilit po ashtu, i ka kërkuar dorëzimin e anëtarëve të Lëvizjes së Fethulla Gylen.
Süleyman Soylu u prit në Rinas nga zv.ministri i Punëve të Brendshme i Shqipërisë, Besfot Lamallari, ambasadori turk në Tiranë, Murat Ahmet Yörük, si dhe nga përfaqësues tjerë qeveritarë dhe të institucioneve turke në vend.
