Skënderbeu do të presë në “Elbasan Arena”, Partizanin e Beogradit, në sfidën e tretë të grupit B. Korçarët do të kërkojnë të marrin tre pikët e para në këtë sfidë dhe janë mjaft të motivuar për ta arritur këtë gjë. Tekniku Daja do të ketë disa mungesa në ekip, mungesa e të cilëve mund të ndikojë në këtë ndeshje. Sulmuesi i djathtë Gavazaj vazhdon të vuaj dëmtimin dhe nuk është i gatshëm për këtë përballje, ndërsa listës së të munguarve i bashkohet edhe Nimaga. Të dy lojtarë me mjaft klas që kanë një vend të rezervuar në formacionin e Dajës.
Të dy lojtarët janë të dëmtuar ashtu si edhe sulmuesi çek Martin Nespor i cili ka udhëtuar drejt Gjermanisë për të zhvilluar disa seanca terapie. Ndërkohë presidenti Ardjan Takaj ka konfirmuar se edhe në këtë sfidë shpërblimi nuk ndryshon. Në rast fitoreje ndaj serbëve në xhepat e futbollistëve të Skënderbeut do të përfundojnë 100 mijë Euro, ndërsa në rast barazimi shpërblimi do të jetë 50 mijë Euro.
