Deputeti Saimir Tahiri është përplasur me prokurorin Hajdarmataj në mbledhjen e Këshillit të Mandateve.
Tahiri ka pyetur Hajdarmatajn nëse është në dijeni se në vitin 2017 ka kërkuar të hetohet pas përfshirjes së emrit të tij lidhur me makinën e shitur.
Hajdarmataj është përgjigjur me “ti”, gjë që ka acaruar Tahirin duke iu kthyer me fjalët “Unë jam ju, nuk jam ti!”.
Po ashtu, gjatë fjalës së tij, deputeti socialist tha se kërkon vetëm të drejtën dhe se nuk po bën politikë, si dhe paralajmëron se “do vijë koha për të bërë politikë”.
Tahiri: Keni në dijeni që në shtator 2015 kam shkuar unë te prokurori i përgjithshëm për përfshirjen e emrit tim dhe kam kërkuar hetim, pas deklaratave se makina ime është përfshirë në hetim?
Unë jam këtu vetëm për të vërtetën, të jesh i bindur se do vijë dita për të bërë politikë.
Kam kërkuar hetim te ju dhe ju keni filluar një procedim penal 15/82 të shtatorit 2015.
Po ju pyes për punën tuaj, dua përgjigje me po/jo, keni dijeni?
Përgjigjet prokurori me “ti”.
Tahiri: Unë nuk jam ti, jam ju!
Hajdarmataj: Kemi dy orë bashkë dhe mund të na shpëtojë ndonjë fjalë…
