Duket se asgjë nuk ka mbaruar për ish-ministrin e Brendshëm, Saimir Tahiri, për të cilin Prokuroria është në pritje të dy letërporosive. Mësohet se në fundjavë dy prokurorët Dritan Prenci dhe Vladimir Mara, kanë udhëtuar drejt Italisë, ku kanë marrë të dhëna për llogari të çështjes “Tahiri”.
Po ashtu, burime të News 24 raportojnë se Prokuroria po heton një udhëtim që kanë kryer familjarët e ish-ministrit Saimir Tahiri në korrik 2014 nga Shqipëria në Itali. Mësohet se në të njëjtin avion me familjen Tahiri, ka udhëtuar edhe Moisi Habilaj. Prokurorët po hetojnë sakaq qëllimin e këtij udhëtimi.
Ndërkohë, Prokuroria ka bërë gati dosjen për 9 të pandehurit e çështjes “Habilaj”, ku thuhet se këta persona kanë bashkëpunuar me ish-zyrtarë të lartë të policisë, si Jaeld Çela, Gjergji Kohila e Sokol Bode si edhe ish-ministrin e brendshëm Saimir Tahiri.
