Autoriteti i Konkurrencës, nisur nga ankesat e depozituara pranë Autoritetit të Konkurrencës nga Qendra, “Konsumatori Shqiptar”, si dhe 3 ankimues, ka njoftuar celjen e një hetimi ndaj operatorëve të telefonisë celulare, pas ndryshimeve të planeve tarifore mujore.
Sipas një njoftimi të këtij Autoriteti, pas aneksave të sipërpërmendura ka filluar monitorimi i tregut të shërbimit të telefonisë celulare.
Nga monitorimi ka rezultuar se, disa nga ndërmarrjet që ofrojnë shërbimet në këtë treg, kanë ndryshuar paketat për klientët me parapagim.
Referuar informacionit të mbledhur gjatë monitorimit, rezulton se tre shoqëri kanë ndryshuar paketat standarte në periudhën 27 mars 2017 ‐ 4 prill 2017.
Të tre ndërmarrjet zotërojnë bashkërisht rreth 95 % në tregun me pakicë të shërbimeve celulare dhe sipas parashikimeve në ligj, ekziston mundësia edhe për të abuzuar me pozitën dominuese në treg.
Për këto arësye Komisioni i Konkurrencës, vendosi hapjen e Procedurës së Hetimit Paraprak në Tregun me Pakicë të Shërbimeve Celulare për të hetuar nëse ka apo jo, shenja të kufizimit të konkurrencës.
Tre kompanitë e telefonisë celulare “Vodafone Albania”, “Albtelecom&Eagle Mobile” dhe “Telekom Albania”, së fundmi kanë ndyshuar çmimet e paketave të shërbimeve telefonike për klientët me parapagesë.
Bën përjashtim operatori “Plus Communication” nga i cili deri tani në faqen zyrtare, nuk ka asnjë njoftim për rritje të tarifave.
