Ish-presidenti i Serbisë, kryetari aktual i Partisë Socialdemokrate (SDS), Boris Tadiç, e ka cilësuar krejt të papranueshme idenë e presidentit serb Aleksandar Vuçiç, për hapjen e dialogut të brendshëm për Kosovën.
Sipas Tadiç, Vuçiç nuk mund të hapë një temë kaq të rëndësishme siç janë identiteti dhe integriteti i vendit, e të mos vendoset dialog për tema të tjera.
Tadiç ka përkujtuar se vetë fjala dialog nënkupton respektim të mendimit ndryshe dhe konstatoi se “Vuçiç është njeri i gabuar për vendosjen e temës së Kosovës, sepse nuk ka raport vetëkritik ndaj vetes”.
“Tema për Kosovën, si temë dialoguese, nuk është e qëndrueshme në kohën e aplikimit të ‘të luftës qytetare’ dhe nënçmimit të oponentëve politikë”, tha Tadiç, raporton FoNet.
Tadiç ka konstatuar se Serbia, pas Marrëveshjes së Brukselit, me pranimin e që të zbatohet sistemi i drejtësisë së Kosovës në veri, ndodhet në ‘linjën e rënies’, kur bëhet fjalë për kapacitetet që të kontrollojë çfarëdo qoftë në Kosovë”.
Ai është i prerë se presidenti i vendit nuk ka të drejtë, as mandat, të humbasë atë që nuk është humbur në luftë, dhe vlerëson se në Serbinë në të njëjtën kohë është krijuar bindja se “është moderne dhe pro evropiane të hiqet dorë nga ajo që nuk është humbur në luftë”.
Tadiç ka thënë se për shkak të kaluarës së tij, Vuçiç ka hapësirë të ngushtë për negociata sesa ai, kur ishte president. “Vuçiç, që bënte thirrje për vrasje të myslimanëve, është dashur që ta kualifikojë veten me kooperativitet më të lartë me Perëndimin, kurse unë kam pasur vija të kuqe, për shkak se i kam humbur zgjedhjet”, tha ai.
