Kryeministri Edi Rama, njëherësh kryetari PS-së ka zgjedhur të urojë besimtarët myslimanë me rastin e festës së Fiter Bajramit, me një mesazh, që ka brenda simbolikën dhe politikën.
Mesazhin e urimit në Facebook, ai e shoqëron me një fotografi të Gurit të Përmetit, një prej simboleve më identifikuese të këtij qyteti, të postuar në Facebook,
“MIRËMËNGJES dhe me këtë pamje magjike të Gurit të Përmetit, Ju uroj të gjithë vëllezërve e motrave të besimit islam, Gëzuar Fiter Bajramin”, shkruan kreu i qeverisë.
Por nëse shikojmë Gurin e Përmetit, në foton e servirur nga Rama, shohim që ai është shndërruar në ngjyrë mavi.
Ky simbol i trashëgimisë kulturore të Përmetit, së fundmi i është nënshtruar një ndërhyrjeje, me qëllim identifikimin e vlerave që mbart, falë një projekti të Ministrisë së Kulturës dhe Bashkisë së Përmetit. Evidentimi i vlerave të tij ishte menduar të bëhej nëpërmjet ndriçimit dekorativ dhe funksional. Por, që ngjyra që do ndriçonte Gurin, të ishte mavija, ngjyra identifikuese e socialistëve, kjo nuk ishte bërë e ditur.
Guri i Përmetit, tashmë nuk i përket më të gjithëve dhe nuk mund të quhet më simbolika e një qyteti të tërë, as trashëgimia me vlera kulturore dhe historike. Ai tashmë është guri që pa të drejtë identifikon Përmetin si qytetin e socialistëve.
Populli ka një shprehje; “ ta bësh gurin të qajë”, ndërsa sot mund të themi një tjetër shprehje; “ta besh gurin mavi”.
