Persona të panjohur, në orën 3 të mëngjesit kanë sulmuar me molotov televizionin grek “SKAI”. Sulmi në fjalë është kryer nga 4 burra me kapuç, të cilët kanë hedhur molotov dhe janë larguar me shpejtësi.
Duke iu referuar mediave greke, personat në fjalë kanë lëvizur rreth murit të ndërtesës, në pjesën perëndimore kanë hedhur molotov dhe janë zhdukur. Menjëherë është sinjalizuar policia, dhe tre makina patrulluese nxituan në vendngjarje.
Tashmë kanë nisur hetimet paraprake, për të gjetur banditët. Sakaq, materiali nga kamerat e sigurisë pritet të përdoret nga hetuesit.
