Në orët e para të ditës është sulmuar verbalisht dhe fizikisht deputeti i Kuvendit të Kosovës, njëherësh kryetari i partisë serbe SLS, Slobodan Petroviç. Rasti në fjalë ka ndodhur pranë një lokali në Prishtinë, pak pasi kishte dalë nga ambientet e televizionit RTK, ku kishte kritikuar edhe ish-ministrin e Bujqësisë, Nenad Rikallo.
Lidhur me këtë ngjarje, një reagim ka ardhur nga kryeministri i Kosovës, Ramush Haradinaj. Ai e ka dënuar ashpër këtë sulm, ndërsa ka kërkuar që autorët të marrin dënimin e merituar.
“Në emër të Qeverisë së Kosovës, dënoj ashpër sulmin ndaj deputetit të Kuvendit, Sllobodan Petroviq. I papranueshëm çfarëdo sulmi që cenon mendimin e lirë dhe bindjet politike të kujtdo qoftë.
Ftoj organet e hetuesisë që të zbardhin rrethanat dhe sulmuesit të marrin dënimin e merituar”, shkruan Haradinaj në rrjetet sociale.
