Gjatë 24 orëve të fundit, emri i presidentit turk, Rexhep Tayip Erdogan u kthye në objekt bisede, pas lajmit të rremë që qarkulloi se ai kishte ndërruar jetë. Emri “Erdogan”, ka qenë fjala kyçe më e kërkuar në Google, pas thashethemit se ai vdiq.
Sipas lajmit që mori ‘dhenë’, pretendohej se Erdogan kishte vdekur për shkak të një sulmi në zemër. Por çfarë fshihet pas këtij informacioni? Në fakt, 65-vjeçari ndodhet me pushime dhe është shëndoshë e mirë.
Pasditen e djeshme, mediat online raportuan se presidenti turk vdiq. Lajmi nuk është komentuar për asnjë moment nga pallati presidencial në Ankara, duke shtuar edhe më tej dyshimet.
Shpërndarja është bërë nga mediat greke, por besohet se lajmi ka nisur pas ndërhyrjes që kurdët kanë bërë në gjuhën hebraike të Wikipedias, duke vendosur një datë për vdekjen e Erdogan-it.
Izraeli ka ndërhyrë menjëherë duke bërë korrigjimin dhe bllokimin e kërkimit në Wikipedia, e duke bllokuar kështu hyrjen e kujtdo për të shkruar diçka.
