Teatri Kombëtar ka sjellë për publikun komedinë “Edmond”, ku mund të rezervoni në datat 24, 25, 26 dhe 27 mars. Kjo shfaqje vjen në interpretimin brilant të aktorëve Lulzim Zeqja, Vasjan Lami, Helidon Fino, Luli Bitri, Laert Vasili, Ilirda Bejleri, Arben Derhemi, Flaura Kureta, Myzafer Zifla, Genci Fuga, Ina Gjonçi, Besmir Bitraku, Genti Deçka, Indrit Çobani.
Historia argëtuese dhe plot peripeci se si Edmond Rostand shkruajti kryeveprën e tij “Sirano dë Berzhërak” vjen me 13 aktorë, 35 personazhe në skenën e Teatrit Kombëtar te ArTurbina. Edmond Rostand një dramaturg i ri, 29 vjeçar, ka dy vjet pa shkruar asgjë…Mes nevojës për të fituar para për të rritur dy fëmijët e tij dhe kësaj gjendje krijuese dëshpëruese, Edmond merr një ftesë bashkëpunimi nga aktori më i famshëm i Francës, Constant Coquelin (Konstant Koklën). Edmond i premton Coquelin-it rolin kryesor në një komedi heroike në vargje, premiera e së cilës do të jetë pas 3 javësh, në prag të festave të fundvitit..
Mes ankthit të komedisë që duhet shkruar për tri javë, tekave të aktorëve, kërkesave të producentëve Korsikanë të shfaqjes, xhelozisë e gruas, historisë së zemrës së mikut të tij më të mirë dhe mungesës së entuziazmit të të gjithë atyre që e rrethojnë, Edmond fillon të shkruajë këtë pjesë të cilën askush nuk e beson. Tani për tani, ai ka vetëm një gjë ku mbështet fort, titullin “Sirano dë Bërzherak”.
