Një anije shpëtimi është përmbysur në Atlantik, jashtë brigjeve perëndimore të Francës duke lënë tre pjesëtarë të ekuipazhit të vdekur.
Ata ishin pjesë e një ekuipazhi prej shtatë personash që kishin shkuar në ndihmë të një varke tjetër që gjendej në vështirësi, si pasojë e stuhisë Miguel.
Në kohën kur stuhia goditi Ile d’Yeu në Francën perëndimore të premten, meteorologët regjistruan shpejtësinë e erës prej 129km/h.
“Deti ishte mjaft i tmerrshëm. Anija kishte një ekuipazh prej shtatë personash ku tre nga ekuipazhi i shpëtimit kanë vdekur. Është një tronditje e madhe për ne dhe një goditje e madhe për të gjithë qytetin”, tha kryebashkiaku Yannick Moreau për kanalin e lajmeve BFMTV.
Dhjetë departamente franceze u vendosën në gatishmëri dhe paralajmëruan për dëmtime të mundshme, ndërsa udhëtimet hekurudhore në perëndim u ndërprenë.
Erërat e fuqishme që kapën shpejtësinë prej 147 km/h janë të pazakonta në këtë periudhë të vitit duke qenë se është fillimi i sezonit veror turistik.
Njoftime për shira dhe erëra me shpejtësi deri në 100 km/h u paralajmëruan deri në gjysmën e Holandës perëndimore. Erërat e forta kishin shkatërruar bregun holandez të enjten, duke udhëhequr policinë në krahinën bregdetare të Zeelandit, të cilët zbuluan një laborator kokaine.
Kur policia u lajmërua për një pemë që kishte rënë gjatë natës, ata panë disa njerëz të dyshimtë që po lëviznin rreth një hambari dhe vunë re një aromë të çuditshme.
Policia tha se laboratori i kokainës ishte një nga laboratorët më të mëdha të zbuluara ndonjëherë, në Holandë./ Përshtati Tirana Today
