Studiuesit japonezë kanë zhvilluar shkopinj të kompjuterizuar, që përmirësojnë shijet e kripura, duke ndihmuar potencialisht ata që kanë nevojë të reduktojnë natriumin në dietat e tyre.
Bashkë-zhvilluar nga profesori i Universitetit Meiji, Homei Miyashita dhe prodhuesi i pijeve Kirin Holdings Co., shkopinjtë përmirësojnë shijet duke përdorur stimulimin elektrik dhe një mini-kompjuter të veshur në një rrip dore.
Pajisja përdor një rrymë elektrike të dobët për të transmetuar jonet e natriumit nga ushqimi, përmes shkopinjve, në gojë ku ato krijojnë një ndjenjë të kripës, tha Miyashita.
“Si rezultat, shija e kripur rritet 1.5 herë”, tha ai.
Miyashita dhe laboratori i tij kanë eksploruar mënyra të ndryshme se si teknologjia mund të ndërveprojë dhe të stimulojë përvojat shqisore njerëzore. Ai gjithashtu ka zhvilluar një ekran televiziv, që mund të imitojë shije të ndryshme ushqimore.
Shkopinjtë që përmirësojnë shijen, mund të kenë rëndësi të veçantë në Japoni, ku dieta tradicionale favorizon shijet e kripura. Një i rritur mesatar japonez konsumon rreth 10 gram kripë në ditë, dyfishi i sasisë së rekomanduar nga Organizata Botërore e Shëndetësisë.
Marrja e tepërt e natriumit lidhet me rritjen e incidencës së presionit të lartë të gjakut, goditjeve në tru dhe sëmundjeve të tjera.
“Për të parandaluar këto sëmundje, duhet të reduktojmë sasinë e kripës që marrim”, tha studiuesi i Kirin, Ai Sato.
“Nëse përpiqemi të shmangim marrjen e kripës në një mënyrë konvencionale, do të duhet të durojmë dhimbjen e heqjes së ushqimit tonë të preferuar nga dieta jonë, ose të durojmë të hamë ushqim të butë”.
Miyashita dhe Kirin po përpunojnë prototipin e shkopinjve të tyre, dhe shpresojnë t’i komercializojnë ato që në fillim të vitit të ardhshëm.
Burimi i lajmit: CNN. Përshtatur nga Tirana Today
