Foshnjat e gjinisë mashkullore me një peshë jashtëzakonisht të ulët që në lindje (në anglisht “extremely low birth weight” ose ELBW ), dhe që peshojnë më pak se një kilogramë, plaken shumë më herët se sa djemtë me peshë normale.
Kjo është ajo që del nga një studim i botuar së fundmi në revistën“Pediatrics”, që analizoi të dhënat mbi njërin nga studimet më të gjatë në kohë, mbi foshnjat ELBW. Ai filloi në vitin 1977, dhe u krye nga Universiteti Mekmaster në Kanada.
Vetëm meshkujt
Duke përdorur orën epigjenetike të Horvat (një test biokimik që përdoret për të matur moshën biologjike), studiuesit analizuan gjenet e 45 të rriturve që lindën shumë nënpeshë, duke i krahasuar me ato të 47 të rriturve të lindur me peshë normale.
Duke krahasuar të dyja moshat biologjike, midis dy grupeve, u pa një ndryshim gati 5- vjeçar, por ky vetëm për burrat. Në fakt, gratë e lindura nën peshë nuk do të dukej se plakeshin më shpejt apo më keq sesa bashkëmoshataret e tyre të lindura me një peshë normale.
Sipas studiuesve, plakja e parakohshme e meshkujve mund të ndodhë për shkak të stresit fiziologjik që i nënshtrohen foshnjat para dhe menjëherë pas lindjes, gjë që si duket menaxhohet shumë më keq nga meshkujt.
“Është ende e paqartë se përse ka një përshpejtim të plakjes biologjike të meshkujve ELBW”- thotë Rajan Van Lisho, drejtuesi i këtij studimi, “edhe pse studimi ynë sugjeron se disa ekspozime të pafavorshme para lindjes, mund të ndikojnë në epigjenomën dhe shprehjen e gjenit tek të porsalindurit” .
Rëndësia e një stili jetese të shëndetshëm
Ky studim e thekson edhe njëherë rëndësinë që ka monitorimi gjatë gjithë jetës i shëndetit të njerëzve të lindur para kohe (dhe jo vetëm si të porsalindur), dhe u kujton meshkujve ELBW se sa e rëndësishme është që të kenë një mënyrë jetese të shëndetshme, për të luftuar rreziqet e një plakje të parakohshme biologjike.
“Ngrënia dhe një gjumë i mirë, ushtrimet fizike, menaxhimi i stresit, mos-pirja e duhanit, trajnimi i mendjes, dhe zhvillimi i lidhjeve të forta sociale”, këto janë këshillat që jep Van Lisho. Ato janë masat më themelore për të optimizuar shëndetin e të gjithëve, dhe në veçanti të burrave që kanë lindur dikur nën peshë.
Burimi i lajmit: Focus. Përshtati: TIRANA TODAY
