Një studim i bërë nga një ekip i Agjencisë Evropiane të Hapësirës (ESA) ka treguar se fusha magnetike e planetit Tokë po dobësohet.
Fusha magnetike është jetike për jetën në Tokë, pasi i mbron njerëzit nga rrezatimi kozmik dhe grimcat e ngarkuara që lëshon dielli.
Ekspertët kanë zbuluar mes Afrikës dhe Amerikës së Jugut një rajon të madh me intensitet magnetik të zvogëluar, të quajtur “Anomalia e Atlantikut të Jugut”. Ata thonë se qendra me intensitet minimal atje është krijuar në vetëm pesë vite.
Sipas hulumtuesve, dobësimi mund të jetë shenjë e faktit që Toka po i drejtohet një ndryshimi të poleve.
Hera e fundit kur ka ndodhur kjo, ishte 780,000 vjet më parë. Anomalia po shkakton kaos për satelitët dhe avionët që fluturojnë në këtë zonë, pasi siç thonë mediat e huaja, shumë prej tyre po përjetojnë atje probleme teknike.
Ekipi i ESA i ka mbledhur këto informacione nga konstelacioni i saj Swarm, që është një grup satelitësh.
Këta satelitë janë krijuar posaçërisht për të identifikuar dhe matur sinjalet e ndryshme magnetike që përbëjnë fushën magnetike të Tokës, dhe i lejojnë ekspertët që të dallojnë zonat e dobësuara.
ESA e ka studiuar fushën magnetike që nga fundi i vitit 2013.
