Shqipëria gjatë ditëve të fundit është përballur me vërshimin e ujërave dhe përmbytje në pjesën më të madhe të territorit si në veri ashtu dhe në jug. Me kalimin e pak viteve, situata mund të përkeqësohet.
Bazuar në të dhënat e ofruara nga Instituti i Burimeve Botërore dhe OECD, Shqipëria në vitin 2040 do të përfshihet në pjesën e vendeve të cilat do të vuajnë nga mungesa e ujit.
Studimi e parashikon dhe e fut atë në zonën në të cilën studimi e emëron si “zona me stres për ujin”. Sipas informacioneve dhe hartës së mëposhtme, vendi ynë përfshihet në zonët me rrezik të lartë, ku theksohet se problemi me furnizimin me ujë do të jetë në nivelet nga 40-80 për qind në vitin 2040. Pjesë e rrezikut jo vetëm Shqipëria, por edhe vendet e Ballkanit Perëndimor, por më shumë do të preket Greqia, e cila futet në zonën me rrezik shumë të lartë nga kjo situatë duke e krahasuar me vendet e Emirateve të Bashkuara Arabe dhe me Afrikën e Veriut.
Hulumtuesit japin alarmin se në mesin e shekullit, më shumë se gjysma e njerëzimit do të jetojë në zonat e theksuara pa ujë, kjo një shenjë alarmi për planetin tokë.Arsyet apo shkaqet që ndikojnë në një problem të tillë janë rritja e numrit të popullsisë botërore, por edhe shpërdorimi pa masë i ujit që i bëhet.
Instituti i Burimeve Botërore studion 167 vende dhe zbulon se 33 përballen me stres të jashtëzakonshëm të ujit deri më 2040. Problemi kryesor vjen nga keqmenaxhimi i ujit dhe kjo është diçka që kryesuesit e shteteve do të duhet të kenë në krye të axhendës së tyre këto problematika. Çelësi i suksesit është që konsumatorët të dinë se si të menaxhojnë dhe si të përdorin ujin, por edhe strategjia e përmirësimit të infrastrukturës, e cila do t’i vihet në shërbim të ruajtjes së shërbimeve ujore dhe përdorimit të tyre me efiçencë.
