Më herët u pretendua se me rritjen e temperaturave, do të kishte edhe zbehje të rasteve të infektuar me koronavirus. Por studimet e fundit e kanë hedhur poshtë këtë tezë, duke na shuar shpresat.
Një studim i fundit ka vërtetuar se koronavirusi mund të transmetohet midis njerëzve në temperatura të larta, dhe në ambiente të lagështa. Studiuesit nga Universiteti Mjekësor Nanjing, Kinë, thonë se 8 persona ishin infektuar me COVID-19 gjatë një banje noti, sauna, në ujë me temperaturë të lartë.
Studiuesit, duke parë rastet janë shprehur se virusi i ri ka shanse të mos ngadalësohet me lagështinë dhe rritjen e temperaturave. Ky është një lajm i keq për shkencëtarët, të cilët po shpresojnë për një ngadalësim, në mënyrë që të marrin kohën e duhur për vaksinën.
Po si ndodhi infektimi në një qendër saune? I infektuari i parë shkoi në një qëndër saune më 18 janar, pasi kishte udhëtuar në Wuhan. Një ditë më vonë ai shfaqi simptomat e COVID-19. Pacienti u diagnostikua më koronavirus, më 25 janar, pasi ua kishte transmetuar atë 7 personave të tjerë me të cilët notoi atë ditë, në temperatura të larta.
Të gjitha simptomat e COVID-19 u shfaqën në të shtatë pacientët, pas gjashtë deri në nëntë ditëve pasi vizituan së bashku qendrën e saunës. Por jo vetëm kaq, në këtë qëndër u infektua po ato ditë edhe një punonjës.
