Gjimnazistë e maturantë kanë bojkotuar sot mësimin, dhe kanë vendosur të bashkohen me studentët, të cilët protestojnë sot prej shtatë ditësh, për plotësimin e tetë kushteve.
Pavarësisht kërcënimeve, gjimnazistët e Tiranës i janë përgjigjur thirrjes së studentëve për t’u bashkuar në protestën më masive të organizuar deri më tani para Ministrisë së Arsimit.
Studentët e kanë nisur me këndimin e Himnit Kombëtar, dhe më pas me parulla për plotësimin e kërkesave të tyre, kryesisht uljen e tarifave.
Studentët e Gjeologji-Minierave janë me kaska të verdha, ndërsa studentët e arteve kanë marrë veglat muzikore.
Nga disa prej drejtuesve të turmës së studentëve është kërkuar të ndalohet një minutë para Kryeministrisë, për të mbajtur 1 minutë heshtje, por protestuesit nuk janë ndalur.
