Vijon protesta e studentëve në ditën e 14-të para Kryeministrisë, ku kërkohet sërish plotësimi i 8 kërkesave pa dialog.
Studentët kanë komentuar takimet e bëra së fundmi të kryeministrit Rama, dje në Fakultetin e Gjeologjisë dhe Minierave dhe takimin e sotëm në Universitetin Bujqësor të Tiranës.
Këtë takim studentët e kanë cilësuar si një takim të mbajtur me studentët e partisë Socialiste, ndërsa kanë bërë thirrje që çdo student të bojkotojë dialogun me kryeministrin.
“Rama ka bërë disa takime dhe thotë se kanë shkuar mirë këto takime me studentët. Me cilët studentë shkoi mirë takimi? Apo me studentët e partisë së tij. Sot Rama ka shkuar në UBT, bashkë me aleancat që ka bërë me rektorë e dekanë, ai ka bërë takimin.
Po na vrasin natën e po na qajnë ditën. Universiteti sot nuk është në dorën e studentit, por tek e pushtetarëve. Studentët janë organizuar, ashtu si studentja në UBT ishte ngritur dhe e kishte bojkotuar takimin, ju bëj thirrje të bojkotojmë çdo takim”, tha një studente para Kryeministrisë.
