Vitet e fundit, dhjetëra mjekë të rinj nga Struga e kanë braktisur Maqedoninë dhe janë zhvendosur jashtë vendit. Shkak ishte situata politike në vend, pamundësia për të siguruar punë të denjë dhe pritja e gjatë për të zënë një vend pune. Shumë mjekë të tjerë të rinj po mësojnë gjuhën gjermane dhe përgatiten për të braktisur vendin. Për situatën aktuale është i shqetësuar dhe vetë kryetari i komunës së Strugës, Mustafa Zabzun, i cili është mjek në profesion. Jo zyrtarisht mësohet se nga Maqedonia vetëm në vitet e fundit janë larguar rreth 700 deri 1000 mjekë të rinj. Nëse të ardhurat e një mjeku në Maqedoni janë rreth 400 euro, në Gjermani janë pothuajse 3,000 euro. Autoritetet mjekësore të Strugës kanë frikë se do të vijë koha, kur shumë spitale do të përballen me probleme të mëdha, për shkak se nuk do kenë mjaftueshëm mjekë.
