Nga: Rudina Hajdari
Krekosja e Edi Ramës në Asamblenë Parlamentare të Këshillit të Europës me siguri i ka gjetur shumë veshë, të cilët janë ndier mirë me atë që kanë dëgjuar duke prekur telat e nacionalizmit brenda tyre. Sigurisht që disa nga gjërat që u thanë në atë fjalim, lidhur me akuzat ndaj UÇK-së për trafik organesh dhe raportin e Dick Marty, apo mënyrën se si Gjykata Speciale po i përshkruan para publikut ndërkombëtar ish-komandantët dhe luftën e UÇK në përgjithësi, a thua se nuk kanë luftuar për liri, por kanë qenë pushtues e barbarë, qëndrojnë.
Por synimi i Ramës nuk ishte aspak të përdorte foltoren për të adresuar një çështje kombëtare, por të përdorte çështjen kombëtare si strehim të fundit. Ai e përdori për të rregulluar pozicionin e tij politik dhe spostuar debatin në një tjetër çështje, aq më tepër kur sapo kishte dalë edhe progresraporti i BE-së, i cili e pikturonte vendin me probleme të thella të korrupsionit, krimit të organizuar, raportin e pushtetit me mediat si edhe kritikonte politika si ajo e amnistisë fiskale, e cila ndihmon në pastrimin e parave të krimit.
Fjalimi, pra, nuk kishte të bënte as me vendosjen në vend të ndonjë padrejtësie, sepse ai e di që fjalimi i tij nuk do të ndryshojë asgjë, madje në fakt unë mendoj se do ta përkeqësojë situatën e ish-komandantëve të UÇK-së që gjenden sot në Hagë. Fjalimi i tij nuk kishte të bënte as me drejtshkrimin e emrit Kosova, sepse kjo është një vendimmarrje, e cila nuk kalon nga ato vise. Fjalimi i tij nuk kishte të bënte as me shpjegimin e pozicionit të Shqipërisë për një çështje të caktuar, sepse pozicioni ynë dihet.
Fjalimi, pra, ishte thjesht një tjetër gjellë propagande e servirur për shqiptarët si këtej dhe andej kufirit, që synon të mbulojë disa të vërteta të tjera. E vërteta është se Edi Rama e ka dobësuar pozicionin politik dhe ekonomik të Kosovës duke ndjekur linjën e Ballkanit të hapur të udhëhequr nga Serbia. E ka dobësuar politikisht Kosovën sepse e vendos në pozicionin e refuzuesit të bashkëpunimit, teksa me të drejtë pala kosovare nuk preferon të hyjë në një marrëveshje ku dobësohet ekonomikisht. Dhe ekonomia na tregon se nga hapja e tregjeve mes vendeve tona, pa rregulla dhe politika mbrojtëse për fermerët e prodhimin në përgjithësi, përfituesi kryesor është vetëm Serbia dhe fiton në kurriz të shqiptarëve si të Kosovës dhe të Shqipërisë. E vërteta është se Edi Rama e ka varfëruar qytetarin shqiptar këto 9 vite të qeverisjes së tij.
“EuroNews”, në emisionin e tij “Barometri”, publikoi një sondazh javën e kaluar, i cili kishte të dhëna ulëritëse. Gati 80% e shqiptarëve mendonin se gjërat në vend shkojnë ose keq, ose shumë keq, dhe kur këta pyeteshin se cili ishte problemi kryesor që hasnin rreth gjysma e tyre përgjigjej “USHQIMI”.
Pra, e vërteta është se shqiptarët sot, në masë, janë duke vuajtur për bukën e gojës dhe stomakun e tyre zor se e mbush dot kakarisja e gjelit në majë të foltores së Asamblesë së KiE. E vërteta është se nuk ka pasur asnjë qeverisje më parë ky vend, i cili t’i ketë futur dorën në xhep kaq thellë shqiptarëve. Dhe nuk e ka futur thjesht në xhepat tona, pra, ne që jetojmë sot në Shqipëri. Jo! E ka futur dorën edhe në xhepin e stërmbesave dhe stërnipërve tanë që ende nuk kanë lindur. Sepse pagesat e çmendura për koncesionet që nuk japin asnjë shërbim, si inceneratorët, sterilizimi, laboratorët, check up etj. janë borxhe, të cilat do të duhen gjenerata për t’i larë. Dhe e keqja nuk mbaron këtu. Paratë që vidhen, pra, nëpërmjet skemave koncesionare, janë para të cilat mungojnë në ndërtimin e shkollave të reja, spitaleve moderne, hapjen e vendeve të punës në infrastrukturë, modernizimin e vendit e kthimin e tij në një hapësirë ku çdokush prej nesh me kënaqësi e pa asnjë merak do të ndërtonte jetën e do të rriste fëmijët këtu.
E vërteta është se gjatë qeverisjes së Edi Ramës shpërtheu vala më masive emigratore në vend, duke shpopulluar dukshëm gjithë vendin nga veriu në jug. Shqiptarët qysh kur ky person u bë Kryeministër kryesojnë statistikat europiane për kërkesa për azil. Shqiptarët sot, në vitin 2022, edhe në këtë moment që po lexohet ky shkrim, janë nëpër gomone duke rrezikuar jetën e tyre dhe fëmijëve në det, për të shkuar diku ku mund të ndërtojnë jetën. E, pra, e vërteta është se 9 vitet e qeverisjes së Edi Ramës janë një pikturë e shëmtuar e mbushur me korrupsion e paaftësi, të cilat kanë mbjellë varfëri dhe emigrim.
Ai e di këtë dhe e ka kuptuar se propaganda e tij me foto e video imagjinare nuk pi më ujë. Ndaj edhe ka zgjedhur një strehë tjetër që u kujtua pas shumë vitesh me shpresë se do i gënjejë edhe njëherë shqiptarët, atë që zgjedhin gjithë maskarenjtë e korruptuar, nacionalizmin e ushtruar nga foltoret e organizmave ndërkombëtare. Kjo, jam e bindur, do të jetë edhe streha e tij e fundit!
