Kur bëhet fjalë për tu dalë në mbrojtje ish-futbollistët e tij, Gianni de Biasi është gjithmonë i gatshëm. Këtë e ka bërë edhe me portierin e kombëtares shqiptare, Thomas Strakoshën, i cili po përballet me një lumë kritikash në Itali.
Disa gabime në ndeshjet e fundit me Lazion e kanë kthyer atë në qendër të vëmendjes, por nuk është kështu për De Biasin. Sipas ish-trajnerit kuqezi, Strakosha është përmirësuar ndjeshëm dhe ka mundësi që të bëjë më shumë.
“Unë mendoj se Thomas në sezonin e kaluar ka treguar se mund të bëjë gjëra të mëdha, se është një portier i madh por është ende i ri”, tha De Biasi për “Radio Sei”. “Unë e kam parë të përmirësuar në lojën me këmbë, por gjithsesi duhet të luajë vazhdimisht dhe të bëjë eksperiencë. Nuk më duket se ka portierë të tjerë të rinj që kanë bërë më mirë, mjafton të shohësh Donnarummën”, ishte ironia e De Biasit duke iu referuar atij që shumëkush në Itali e quan portierin e të ardhmes.
