Presidenti Meta i është përgjigjur qëndrimit të ambasadores së SHBA në Tiranë, Yuri Kim, e cila u shpreh se është e shqetësuar për lojërat që po bëhen në Reformën në Drejtësi.
Meta u shpreh se Kim ka të drejtë, pasi aktorët politikë në vend po bëjnë lojëra. Kreu i shtetit tha në një deklaratë për mediat se BE kërkon përfshirjen në dialog të opozitës reale.
Ndërsa solli në fokus se ka katër vite, që ka kërkuar që të stopohen lojërat me Reformën në Drejtësi.
“Nuk kam parasysh Këshillin Politik të Reformës Zgjedhore, por e kam tek gjithëpërfshirja dhe mund të ketë një emër tjetër dhe një nivel më i lartë.
BE kërkon përfshirjen në dialog të opozitës reale. Unë kam katër vite që them stop lojërat me Reformën në Drejtësi, prandaj them se ambasadorja ka të drejtë për atë që thotë.
Shqetësimi është i drejtë, pasi aktorët politikë kanë luajtur dhe presidenti nuk është aktor politik, por kreu i shtetit. Kam kërkuar gjithmonë zbatimin e Reformës në Drejtësi. Tani që jemi në këtë situatë, përsëri presidenti është gati të ballafaqohen të gjithë, për të parë se kush ka bërë dhe kush po bën lojëra.
Nuk po negocioj asgjë përveç këtyre 14 pikave. Këto i dinë të gjithë që në 8 prill, përfshirë ambasadoren e SHBA dhe ambasadorin britanik, që s’është më as në BE. E dinë të gjithë platformën e presidentit Meta, do të jetë kudo, që të shikojnë dhe vlerësojnë se çfarë ka kërkuar presidenti Ilir Meta”.
