Deputetët e Sri Lankës kanë zgjedhur kryeministrin Ranil Wickremesinghe si presidentin e ri të vendit, pavarësisht jo popullaritetit të tij në publik.
Wickremesinghe përballet me detyrën për të nxjerrë vendin nga kolapsi i tij ekonomik, dhe për të rivendosur rendin publik pas muajsh protestash masive. Ai mundi rivalin e tij kryesor për këtë detyrë, Dullus Alahapperuma, me 134 vota kundër 82 në votimin parlamentar.
Ish-presidenti i Sri Lankës, Gotabaya Rajapaksa u largua nga vendi javën e kaluar. Ai shkoi në Maldive dhe më pas në Singapor, pasi mijëra protestues sulmuan rezidencat e tij presidenciale dhe ndërtesat e tjera qeveritare, duke kërkuar dorëheqjen e tij.
Ata kishin kërkuar gjithashtu dorëheqjen e zotit Wickremesinghe, i cili u emërua kryeministër në maj. Protestuesit dogjën shtëpinë e tij private dhe gjithashtu sulmuan zyrën e tij kryeministrore në Colombo në demonstrata kundër udhëheqjes së tij.
Sri Lanka ka falimentuar dhe përballet me mungesa akute të ushqimit, karburantit dhe furnizimeve të tjera bazë.
Pas zgjedhjes së tij, Wickremesinghe i tha parlamentit se kombi ishte “në një situatë shumë të vështirë” duke shtuar se “ne kemi sfida të mëdha përpara”.
Ai do të synojë të rivendosë stabilitetin politik në Sri Lanka, në mënyrë që ajo të mund të rifillojë negociatat e ngecura me Fondin Monetar Ndërkombëtar (FMN) për një paketë shpëtimi.
Ai bëri thirrje për unitet politik dhe partitë opozitare që të punojnë me qeverinë e tij për të mirën e vendit. Megjithatë zgjedhja e tij mund të shkaktojë trazira të mëtejshme dhe protesta masive. Për dy javët e fundit, demonstruesit i kishin bërë thirrje vazhdimisht zotit Wickremesinghe të jepte dorëheqjen, pasi ata e shohin atë si pjesë të elitës politike që kishte keqtrajtuar financat e Sri Lankës.
Wickremesinghe është gjashtë herë kryeministër i cili ka qenë në politikën e Sri Lankës për 45 vjet. Ai sfidoi thirrjet e protestuesve për të dhënë dorëheqjen javën e kaluar, pavarësisht protestave të mëdha. Ai mori postin e ushtruesit të detyrës së presidentit pasi Rajapaksa u largua, dhe fitorja e tij të mërkurën do të thotë se ai do të mbajë pjesën tjetër të mandatit presidencial deri në nëntor 2024.
Burimi i lajmit: BBC. Përshtatur nga Tirana Today
